La Tarrancha, conciertu y discu.

La banda asturiana de Ska-fusión La Tarrancha va dar el so postrer conciertu esti sábado 10 d’ochobre xusto enantes d’entrar a grabar lo que va ser el so primer discu de llarga duración.

La oportunidá pa gociar del so directu va ser esti sábado día 10 en “Les feries” de L.lena, onde van compartir escenariu con Los Berrones. Esta va ser la ultima oportunidá pa velos a unos díes de qu’entren en TuTu Estudidiu a grabar el discu qu’agora mesmo tan cocinando nel llar d’ensayu. El discu, asoleyau por Algamar Producciones, va tener por nome “Ó-3-3” (Otrestres) conocida frase coreada pol publico nos conciertos pa pidir mas canciones a los músicos. Siguen con esti nome cliptográficu el xuegu qu’empecipiaran va tiempu col so single “Exit-encia” y la so maqueta “Qlt” (Culete). Nel discu vamos poder disfrutar del mecigayu de sonios que van dir dende los sones del funk, el swing, o’l ragga, a tintes folk, tradicional o pachanga, siempre embaxo la clara llinia del Ska y el Reggae que caracteriza el so personal estilu. Esi estilu ta marcau pola llimpieza nel soniu, pol afalagu al baille, pola bona mezcla de ritmu y melodia y pola busqueda de complicidá col públicu. La banda, que durante munchu tiempu furruló con doce y trece músicos, anque agora ye un grupu d’ocho miembros nel que conviven guitarres, baxu, percusiones llatines y africanes, batería, curdión diatónica, trombón, flautes y voz.

La Tarrancha nun tubo nunca fácil la so xera, y a lo llargo d’estos 7 años d’esistencia tubo los sos problemes debío al gran númberu de músicos que yeren y la dificultá de mantenelos establemente nel tiempu, siendo la mayor causa d’éllo la emigración llaboral por gran parte de los sos miembros. Poro, ta claro qu’esto ye un enantes y un dempues, esti discu ye una forma de pagar una delda col so públicu y con éllos mesmos, ye una apueste pa dir p’alantre y dexar una etapa de dires y venires pa intentar estabilizar el grupu y dir trabayando ca vez mas nun soniu propiu. Nel conciertu d’esti sabado vamos poder disfrutar de temes vieyos y conocios de la banda, otros mas nuevos que vienen mostrando nes actuaciones d’esti branu y dalgún qu’otru estrenu.

Nun vai venir????

vemonos en Banuncias!!

salú!

Coincidiendo na fecha colo que supónse que ye un actu cultural de grandes dimensiones, un garrapieyu rapazos/es buscaba un requexu pa desarrollar les sos inquietues.

La Selmana Negra d’aquel branu xixones trayía como tolos años lliteratura, música y tamien consumu, munchu consumu; y a la par non mui lloñe d’elli, xente activo y contestatario facia la so selmana de desescobru particular na antigua fábrica de colchones de Flex, en plenu barriu de La Calzada.

 L’antigua fabrica de colchones nun tardó en garrar forma y garró el verdaderu sintíu d’aquel llema comercial y pasó a ser una FABRICA DE SUAÑOS, pero esta vez de verdá. Xente mozo, menos mozo, con esperiencia, ensin ello, xente d’estremaes ideoloxíes pero con un obxetivu común: dotar al barriu y a Xixón d’un espaciu llibre, autoxestionáu, onde poder desarrollar distintes actividaes socioculturales y polítiques. Nacía así el Centru Social Ocupau y Asutoxestionau La ReFLEXón.  

  A lo llargo de casi un añu d’esistencia nel centru social fixéronse munches actividaes, sirvió d’infrastuctura pa entamar actos d’estremaos colectivos qu’hasta esi momentu nun teníen munches alternatives pa desendolcalos.  Hebo talleres d’alfabetización castellano pa inmigrantes, talleres de percusión africana, ciclos de cine y documentales (CINEFLEX)… Habia un “tienda” de ropa gratis, celebráronse comedores populares, amagüestos… Hebo una bona riestra de charres y alderiques que falaben de la situación d’otros pueblos del mundu, de la represión, de problemes medioambientales, de soberanía alimentaria, de dellos aspectos del sistema capitalista,  d’agroecoloxia, de lluches sociales… En definitiva foron munches les xornaes y mui interesantes les temátiques que se fixeron.  

  Nun faltó la poesía, como tampoco nun faltó el graffiti, como nun lo diba faer el teatru o’l monólogu.  En munches d’eses xornaes entamaes dende La Reflexón o dende otros colectivos qu’agospiaben los sos actos nel CSOA, mui importante foi la música. Podría dicise que tan importante foi la música pa La ReFLEXón, como La ReFLEXón lo foi pa la música.

  Y ye qu’ha falta d’un llugar onde poder tocar ensin que te sangren por alquilar la sala, onde entre xente abondo, onde la barra seya autoxestioná, onde músicos y públicu siéntanse como en casa; nun quedó otru remediu que crear l’Escenariu de Flextricia. Hai que dicir qu’anque el llocal dexara muncho que desear en cuanto a condiciones acústiques pola mor de les sos característiques arquitectóniques, la xente pudo gociar de mui bonos conciertos y d’un buen espaciu.  

Ya digo, fueron munchos los festivales, anque a min prestábame más qu’enumeralos toos, nomar a los grupos que pasaron per Flextricia. De xuru que dexaré dalgún. Por fortuna tuvi la suerte de poder tocar delles veces na ReFLEXón, y tuvi la suerte de compartir fecha con munchos otros grupos amigos, una de les coses mas agradecía de tocar ye eso, faer amigos. Amigos tanto d’Asturies como de fuera, tanto estatales como del restu Europa, reconocíos o más mozos, pero toos ellos amigos como

Skama La Rede
Hector Braga
Falanoncaduca
La Tarrancha
Arrabuñazo
K-Nalón
Skontra
Desechos
Habeas Corpus
Another Year
The Gundown
Insert Koin
Urban Kids
Payback
State of Lies
Arma X
Sambre
Nocivos
Vinagre de sidra
K T Grapo
Hachazo
Hurto
Odio Visceral
13 Palabras
Toli Morilla
Talco
Gomeru
Kólico
Dakidarria
Galán
Vagrant
Kung Fu
Flying Padres
Doble –T
Jerfla Thülens
Hysteria
DCA
Estropajo
Bonestorm
N’Ochebre
Overland
Mameyes Blues Band
Falkatruada
Ugly Bastards
...etc. 

  Nun hai duldes de la importancia qu’esti centru tuvo pa la música, nun creo que nenguna alministración llocal nin autonómica asturiana haiga programao esos conciertos n’un añu, pero agora eso morrió. Por qué morrió???   

  Pues porque hai xente a la que nun-y interesa que la mocedá s’organice, que reflexone, que tenga conciencia propio, que nun dependa de l’alministración pa poder desarrollar un actividá qu’esta mesma nun-y va a ufrir.   La vieya fábrica de colchones llevaba 10 años abandoná, siendo abellugu de yonkis, de basoria, d’escombros, d’humedá, de too eso que nun presta ver nes cais pero pa tenelo ehí metío ta mui bien.

  La vieya fábrica de colchones yera un sitiu muertu, pero muertu nun estorbaba, naáas taba esperando al momentu especulativu adecuáu, como si toviere a barbechu. Agora sí, agora que ye La ReFLEXón y desborda actividá ye cuando molesta.   L’antigua nave d’una empresa que zarró con un ERE como los tan famosos qu’anguañu tan aplicandose en tantes y tantes empreses. Agora nun yera mas qu’un activu ociosu pa Construcciones Llorente, la empresa que paez ser la propietaria del edificiu y que solicitó al xulgáu el desagospiu del CSOA La ReFLEXón.

  Asina ye como la xente del centru social recibía la noticia del Xulgáu d’Instrucción Nº4 de Xixón que foi mandá a un solidariu, identificáu nuna de les incurxones feches pola Policía Nacional; la xueza afitaba les 12 hores del vienres 5 de Xunu, como plazu caberu para proceder al desgospiu “voluntariu o forzosu” del CSOA LA REFLEXÓN.  Esti yera’l final d’una FÁBRICA DE SUAÑOS, pero nun va ser el final de los suaños, non, ye simplemente una mudanza. Porque mentanto haiga espacios vacios, lo que sobren ye suaños con qu’enllenalos.  

Nun quedeis coles manes en bolsu. Actuái!!
Solidaridá col CSOA La ReFLEXón!
Un desagospiu, otra okupación!

El mes pasáu dexábanos con una noticia rara o sorprendente o yo nun se como llamala. Y ye que la Conseyera de Cultura y Turismu del “Principado de Asturias”, declaró FIESTA o ACTIVIDAD DE INTERÉS TURISTICO DEL PRINCIPADO DE ASTURIAS al “Festival Derrame Rock”. Qué qué significa esto?? Pues que'l conociu festival va pasar a formar parte d’otra riestra d’actividaes que se desendolquen n’Asturies y que tienen el mesmu cuñu. Y lo sorprendente de too, nun ye qu’esti reconciminetu se-y dea a una actividá que tien la música como principal esponente, non, ye qu’esta ye la primer vez que se-y da esti cuñu a una actividá entamaná por un entidá privá, oseya, a una empresa.

N’Asturies hai tres figures d’esta triva. Una ye “Fiesta de Interés Turístico Internacional” nel que namás figura El Descensu Internacional del Seya, otra ye la de “Fiesta de Interés Turístico Nacional” onde hai unes cuantes ente les qu’atopamos L’Amurabela de Cuideiru, la Corderá del Prau L.laguezos, La Fiesta’l Pastor na Vega d’Enol… y dempues ta la tercera na que siguimos col dichosu términu de “regional” (debe faer referencia al noroeste peninsular digo yo, porque esto va trenta años que ye una Comunidá Autonoma uniprovincial, oficialmente falando). Osea “Fiestas de interés turístico regional”, onde podemos atopar dende la Fiesta les Carroces de Valdesoto, Les Fiestes de La Regalina en Cadaveu, el Descensu Folkloricu del Nalón… y anguañu el Derrame Rock.

La verdá nun se que ye lo que m’anima a escribir estes llletres, per un llau nun quiero furar nin espotricar a la escontra’l Derrame Rock, y per otru, sé que cualquier cosa que se diga sobre la politica cultural desti mal llograu pais perteneciente a la “región” del noroeste peninsular va cayer en sacu rotu. Pero bueno, nun va ser too tragar. Eso si, prometo nun faer referencia a lo mal que ta’l nuesu padrimoniu arquitectónicu, nin a como taba lo que tiren o dexen cayer, nin de cómo tan tantes y tantes coses a les que-yos urxe una figura de proteición. Tampoco nun voi falar de la fobia pa cola cultura y la llingua propies y tampoco nun voi falar de… ¡¿NUN DIXE QUE NUN DIVA FALAR D’ESO???!!!  Entós pa que me tiráis de la llingua??

Ta claro que’l Derrame Rock ye un productu turísticu en toa regla. Pero, bueno, un productu turísticu nun ye lo mesmo qu’un atractivu turísticu. Eso sedría como comparar el Seya (un atractivu turísticu) con una empresa de canoes (un productu, o mas bien una actividá, lo mesmo qu’el Derrame Rock). Lo que si ta claro ye qu’el festival atrae a xente d’Asturies y fuera d’Asturies. Xente que fai un gastu ya seya en gasolina, trasporte públicu, nos comercios llocales de Pravia…, de xuru que la infraestructura hostelera tamién nota la presencia del festival. Eso ye positivo, pero ye suficiente pa dai esi reconocimentu? Pamique non.

Ya lo digo, yo nun quito meritos al Derrame n’esi sentiu, que los tien, pero… ye una fiesta d’interes turísticu pa cualquiera??  Tamos falando d’una entidá privá, un empresa, un negociu, que desarrolla una actividá como meru negociu y na que pa poder participar hai que pagar una cantidá (ca un que valore si ye caro o non). Vamos que nun ye una iniciativa popular nin vecinal que l’alministración puea premiar con esti gallardón. Vamos que nun ye un festival que tea al alcance de tol mundu, vamos que ye mas un negociu qu’una acividá cultural (eso si, el conteníu cultural del Derrame nun se pué negar (música, charres, exposiciones…pero sigue siendo un negociu privau non popular).

Dempues podríemos analizar si la música o los músicos asturianos vense representaos n’esti certame, aparte de los propios grupos del sellu discográficu qu’entama'l festival y pocos mas. Dempues podríemos analizar si la llingua, nin siquiera la toponimia asturiana tan respetáos n’esti festival. Pero como ya dixe, el tema equí nun ye’l Derrame Rock, non el tema ye otru.

Por qué, entós… que premia la Conseyería de cultura con esti gallardón.?

Premia la poca o casi nula implicación pa cola cultura en xeneral y la música en particular. Ye un gallardón d’enrrollaos, “mirai, premiamos a los macarrarockeros qu’acampen tolos años en Pravia”. Si, con eso llaben el focicu, o inténtenlo.

Mentantu, nes nueses ciudaes los llocales qu’entamen conciertos vense afogáos poles multes y les restricciones.

Mentantu, les programaciones festives fieden a rancio y dan la espalda a la gran montonera de bandes y músicos qu’hai n’Asturies.

Mentantu, la conseyería nun pon lo posible por potenciar nin promocionar lo qu'hai na sociedá. Y eso, nun ye gastu. La cultura ye un drechu, y un deber por parte l’alministración el de puxar por éllo.

Esi ye l’exemplu de la RTPA, un ente públicu qu’esplicitamente tendría de punxar por eso, por ser un espeyu de toles manifestaciones culturales d’Asturies. Y como non, una de les mas potentes, una de les mas participatives, una de les que cuenta con mas exponentes… nun ye otro que la música. Esa música que de mano nun van pinchar na mayoría d’emisores priváes (a nun ser qu’haiga Peres per delantre), pero que tendría de tener la so canal de difusión na nuesa tele y na nuesa radio. Porque faer cultura nun ye solo un deber, non, tamien crea riqueza. Nun ye raro ver como sitios como Andalucía o Irlanda faen ingresos gracies a la múscia, y cuando falamos de música non solo falamos de músicos, si non de toa esa reciella formá por tecnicos de son, de lluces, xente que trabaya nel ambetu de lo audiovisual… Invertir na nuesa música ye invertir en nueves teunoloxies, o polo menos da-y dignidá salarial y de futuro a esa xente que maltrabaya n’esi campu.

Pero claro, n’Asturies, estos políticos con conciencia de “región” val-yos con tar contentos con esparder cuatro sudvenciones pa un par de conciertos, o con subvencionar un par de discos, o con da-y un galardón a un festival, anque seya una empresa. Pasa eso, porque creen qu’asina tapen boques, o ya ni eso, piensen que lo que fai ye la caraba! Que tan fechos unos cosmopolitas de la hostia. Porque ellos tamien fain lo mesmo, tragar subvenciones, marafundiar perres ensin importa-yos construyir futuru.

Ye hora de que la nuesa música tenga el so espaciu, nos nuestros llocales, nes nuestres cais, nos nuestros medios de comunicación, nos nuestros festivales (refiérome nos públicos). A lo meyor asina, igual pasa lo mesmo que notros sitios, y la nuesa música garra punxu, les nuestes bandes garren la estabilidá y la dignidá que-yos fai falta y son mas y mas los festivales privaos que se fixen en éllos de cara a faer la programación.

Pos eso, esti branu tornamos a los escenarios dempues del parón d'iviernu. esperemos venos pelos praos!!

Nun dexéis de correr la voz pa ver si mos contraten.

salÚ!

Esto que vos pongo acontinuación ye la mio columna d'opinión na web fnast.net. Convidovos a que paseis pela web en cuestión pa tar al tantu de tola actualidá músical d'Asturies día a día. Aparte podeis ver entrevistes, reseñes, reportaxes y demas información interesante que se presesnta ca nueva edición mensual. lo dicho déxovos con esta columna d'opinión, pero tamien podeis pasar a lleér otres coses qu'escribi pal la edición de febreru, como son Una completa reseña sobro l'anuariu de la Música Asturiana, la Crónica del conciertu presentación del discu "Defrente" del grupu Delagua o un reportaxe sobre'l cantar La Danza de Viodo y les sos conexones internacionales, entitulau "La vieya danza del mundu".

Lunes 02 de Febrero de 2009 14:12

A lo llargo de la hestoria, fueron munches les persones que intentaron faer un retratu colectivu del pueblu asturianu. Escritores, historiadores, sociólogos, pintores, fotógrafos... Ca un d'ellos consiguiolo na so medía.

Güei tenemos a l'alcance (non toos) una ferramienta mui potente: la rede, internet. Eso facilita la comunicación ente xente que diba ser difícil que llegaran a atopase d'otra forma, eso axiliza l'intercambiu d'información, eso fai que dependiendo de lo que se quiera trabayar... distintes persones puean sumase con una mesma inquietú y faer un buen trabayu.

Ye’l casu por exemplu del álbum entamáu pol antiuguu componente de Felpeyu, Isidro Suárez, baxo’l nome de “Músicos tradicionales asturianos” nel que podemos atopar una montonera de semeyes mui interesantes. Esta colección abarca más d'un sieglu d'imaxenes, nes que nun solo podemos ver qu'instrumentos tocaben nuna u otra dómina, o nuna u otra zona d'Asturies. Sinon tamién como yeren les fiestes, como yeren los nuestros antepasaos, la forma que teníen de rellacionase, de vivir el tiempu d'ociu y decansu, de disfrutar la música de... Nun hai duda que'l testimoniu pal mundu la cutura y la música asturiana ye d'un gran valor.

Y eso nun diba ser posible ensin la suma d'esfuerzos de xente que desinteresadamente va apurriendo les semeyes que tien arrequexaes en casa y que d'otra forma diben quedar escaecíes ente'l polvo. Ye imposible tresmitivos esto ensin nun dexar de convidavos a que paséis pel so espaciu y si teneis daqué de material interesante, pos andechar na xera http://www.flickr.com/photos/29327835@N08/sets/72157606575859717/

Pero esti exemplu namás me sirve d'entrá pa falavos de la sonrisa de l*s asturian*s.

Si, agora mesmo hai un sitiu onde podemos ver la sonrisa de mas d'ochomil asturin*s baxo otra iniciativa bien d'interesante, bien de necesaria. Nun ye otro que la campaña de YO DOI LA CARA POLA OFICIALIDÁ, que tien entamá el Conceyu Abiertu pola Oficialidá (CAO).

Que qué ye’l CAO? Pos ye una plataforma cívica que tien como únicu oxetivu algamar la oficialidá de la llingua asturiana y del gallego-asturianu nel Estatutu d’Autonomía d’Asturies. Y dientro de les actividaes que desarrollen ocurriose-yos la idea de que ca un de l*s asturian*s que comparten esi oxetivu dean la cara.

Pa tal efectu nun fai falta namás qu'una camara fotos y un cartel col lema YO DOI LA CARA POLA OFICIALIDÁ.

La campaña ta siendo un ésitu, non solo hai semeyes de xente d'equí, non. Son munches les semeyes llegaes dende otres partes del mundu que simpaticen cola causa y que n'estremaos idiomes dan la so cara pola nuestra llingua, asi nun ye raro ver cartelos n'euskera, n'italiano, arabe... ta siendo copiá incluso por alguna entidá privá, como ye’l casu de Bancaja y la Generalitat Valenciana.  

Esta riestra semeyes nun solo nos muestra una voluntá colectiva, la necesidá del reconocimentu d'un drechu básicu, tamién nos muestra cómo somos. Dientro de munchos años (si esti mundu entá esiste), van ser munchos los sociólogos que puedan tirar d'esta campaña pa ver como yeremos l*s asturian*s. Pa ver como yera la vida familiar, como yera la xente nel trabayu, nos conciertos, na nuechi, na playa, que xente diba a les manis, como se vivieron momentos hestóricos nel fútbol asturianu, como vivia la xente el chigre, la terraza, como yera la xente d'aldea, como yera la xente de ciudá, como yera la xente nel occidente, nel centru, nel oriente, na mariña, na montaña, como yeren les vacaciones y como munchos vivien na emigración.

Presta asomase de vez en cuando pel espaciu de YO DOI LA CARA POLA OFICIALIDÁ y ver a xente que conoces, a xente que te suena, a amigos, familiares, a xente que va años que nun ves, o incluso al fíu que nunca conociste d'un amigu o amiga que va años vive nel exiliu llaboral.

Hai xente conocío nel so ámbitu y xente un poco menos conocío. N'esti aspectu la campaña tien algo que nun me presta muncho. Entiendo qu'hai personalidaes que la xente tien n'apreciu y el fechu de velos sofitando la campaña, puea da-y un emburrión, un poco de notoriedá. Pero yo en parte nun lo veo asina. Mirando les semeyes veo escritores, dramaturgos, deportistes... y munchos apaecen como ún mas - lo cual veo normal - y otros apaecen resaltaos. Yo nun tengo na esconta'l mundu'l deporte, pero ¿Acasu desmerez más un músicu (que ye de lo que mas abunda nes fotos y munchos d'ellos de munchu pesu) qu'un deportista? Yo creo que non, lo mesmo que creo que tampoco merez menos una güelina d'un pueblu de Bual qu'un músicu d'Uviéu.

Pero eso ye un problema d'escala de valores. Y caro detrás de la campaña hai munches sensibilidaes y ca ún tira pal so gustu. Precisamente como hai munches sensibilidaes la cosa habría de ser lo mas horizontal posible. A mi tanto me val la pallabra d'un paisano que saca la semeya mientres ta a la herba, qu'un xugaor nun campu fútbol d'herba artificial.

Saliendo d'esta apreciación, teo que dicir que la campaña podría ser la envidia de los responsables de la mesmísima campaña electoral del Obama de marres, que mira si ye buena, que media humanidá piensa qu'acaba llegar el salvaor, y entovía nun movió un deu.

Yo tengo clara una cosa, nun se si conseguiremos l'oxetivu de la OFICIALIDA, lo que si sé (y el silenciu mediáticu nun va poder negar), ye que munch*s asturian*s tan dando la cara pola so llingua.

Otra cosa que tengo clara ye que pa ver la sonrisa colectiva d'Asturies hai qu'asomase a http://www.flickr.com/photos/doilacara, y espero que si dalgún día lo que hai qu'enseñar son los dientes, tamién tea esta xente detrás.

  
SalÚ! Y a dar la cara!!   

Enllaces relacionaos:
http://www.flickr.com/photos/doilacara
http://www.flickr.com/photos/29327835@N08/sets/72157606575859717/

Como viesteis nel pos anterior, tubimos nominaos a los premios de La Música qu'entama La Academia de Las Artes y Las Ciencias de La Música (entidá creá pola SGAE).

Ante ello, y en vista a la nuesa postura cola SGAE, pidimos-yos nun formar parte de tala nominación de la qu'enxamas teniemos qu'ahaber tao. La rempuesta foi positiva, pos ya nun formamos parte de los cuatro nominaos. Esperamos que si nominen a dalgún otru grupu o artista que se lo mereza (segruo qu'hasta mas que nosotros) siempre y cuando quiera participar d'esos premios.

La verdá que la conversación que tube cola trabayaora de la academia foi correcta ya incluso mostrose comprensiba en cuanto a la nuesa postura non hipocrita. Pero dixo qu'esto diba anlizalo el departamentu xuridicu. Esperemos que nun pase na, hehehe.

La verdá ye que menudu espolin s'armó! Na rede les coses cuerren muncho y la noticia fue a parar a una paxina de noticies. La noticia xeneró munchos comentarios unos de sofitu y otros pa dicimos que si lo que queriemos yera publicidá, que si nun mos conocien en casa... que si patatín que si patatón.

Y depues hubo un puntu que nun s'entero de la misa a la media y esbabayó n'aquella paxina y tamien n'esta, onde punso esto:

Nota*esto ta sacao de la otra web, pero pa ver lo que punso nesta podeis calcal onde los comentarios del post anterior.

La academia de la Música acaba faer publico esta selmana la rellación d’artistes y grupos nominaos a los premios d’esti añu. Los nominaos n’esta edición al meyor cantar n’asturianu son La Bandina, Esther Fonseca, el Colectivu de músicos pola Oficialidá y K-Nalón. Dende K-Nalón queremos faer publico qu’anque tamos agradecíos pola nominación nun queremos formar parte de tales premios.

Consideramos positivo qu’alguien haiga puesto el güeyu en nosotros, pero nun sería xusto pa nos, nin pal restu d’artistes que tamién podrien tar ente los finaistes.

La canción cola que tamos nominaos ye Dixebra, un cantar que forma parte del tributu-homenaxe que ventidos bandes asturianes fiximos al grupu Dixebra. Esti discu ta rexistrau na SGAE, pero K-Nalón nun lo ta, y esa ye la cuestión.

El nuestru grupu apuesta dende’l principiu pola llibre difusión de la música y la cultura, y n’esi sen toles nuestres creaciones tienen llicencia Creative Commons del tipu

Reconocimientu-Non comercial-Sin obres derivaes (3.0 España License)

Y ye ehí onde la nuesa filosofía choca colos planteamientos de la SGAE.

Respetamos a tolos grupos que formen parte de la SGAE, pero nosotros nun compartimos la politica d’esta entidá y tamos totalmente escontra’l famosu CANON que graba’l preciu de munchos productos electronicos. Polo que sería un actu hipocrita pola nuesa parte aceptar cualquier nominación fecha pola SGAE.

Ante ello, K-Nalón acaba mandar un comunicau a esta entidá pa que nun cuenten con K-Nalón y reconsideren a los otros grupos que nun entraron como finalistes. Polo que tenemos en conocimientu ye la primer vez que se plantea esta cuestión nos premios anuales de la Academia de la Música.

Col entamar del añu, entamaba un nuevu proyectu Fnast.net (http://www.fnast.net/). D'elló ya vos falén'otra ent´ra, asina quenams tenis que restolar pel blog. Lo que vos pongo a continuación ye la mio columna d'opinión que tengo nesta web. Esta qu'aprobecho a ponevos y e la correspondiente al mes de xineru, ya que ta apuntu salir la entrega del mes de febreru.

Ábrese con esti numberu una etapa nueva no que se refier al la publicacion “Fechu N'Asturies”, pero non solo ahí, espero qu'ábrase tamién nel panorama de la música que se fai anguañu n'Asturies. Un formatu nuevu , dixital, de llibre difusión, con enllaces, con fluidez y con acesu dende cualisquier parte del planeta “entre comines”. Y a eso ye a lo que tien que naguar la música, a ser difundia llibremente a cualisquier parte del planeta y como aficionau a poder gociar cola musica de cualisquier requexu'l mundu.

Nesti aspectu entren en xuegu munches coses en favor y otres a la escontra. A favor tenemos myspace, youtube, goear, la mula, les webs ... Y a la escontra tenemos a la SGAE (nun voi soltar muncho sobre élla porque de munch*s ye sabio l'afición que tienen a demandar a medios de comunicación alternativos como alasbarricadas.com y munches mas webs). Respeto y comprendo al/a artista o cread*r o bandes que se faen socios de la SGAE pola mor de defender los sos drechos como creadores, pero nun respeto nin tolero a lo que ye la SGAE en si, una autentica maquina de “recaudación” (por nun decir otra cosa que me conllebe denuncia) col amparu de l'alministración pública.

Per un llau tenemos el famosu canon, que medra'l preciu d'algunos productos hasta un 40%, dexando cifres millonaries nes arques d'una SGAE que van quedar en manes d'una reciella de creadores que namas representen al 5%, pero estos son los que mueven l'asuntu. Según los estudios de la propia SGAE los artistes namas cobren un promediu del 6% por cada CD vendiu, el restu los cuartos son pa les entidaes de xestión de drechos y discográfiques. Al final l'autor paga mas de lo que recibe. Ya lo dixe, yo nun tengo na escontra los grupos que tan na SGAE, pero voi da-yos argumentos pa nun tar, ye mas quiero dar argumentos p'afechar cola SGAE, y ye que la ministra de cultura ya falaba de cobrar un canon por cada linia ADSL.

Gasten perres en campañes pa llamanos lladrones por faer usu del nuestru drechu a copia, pol fechu de comprar un CD ya nos multen... ye como si te metiesen una multa y te quitasen un añu de carné col primer pagu'l coche, pola posibiladá de que cometas una ifración grabe. Ensin embargo nun escuerren a ninguna d'eses empreses que contraten en precario o esploten en xornaes interminables, o que nun paguen o... y entá peor, cuando eses empreses la mayor parte les veces tan subcontrateas a l'alministración publica. Éso nun ye delitu, non. Ye mas la propia SGAE ta cobrando millones d'Euros por música con copilefth supuestamnete llibre de canon a webs como myspce.com.

Esto ye namas una migina de lo que representa la SGAE, beneficios millonarios pa unos pocos y migayes pa los creadores. Pero.... qué otres alternatives tien la creadora? Pos tenemos les llicencies Copilefth y les llicencies Creative Comons (que pue ser de llibre o semi-llibre disfusión y usu). Por desgracia entá nun son mui conocies por parte de munch*s creadores, pero defienden la propiedá intelectual de la obra, cola diferencia de que puen ser llibremente difundies nos medios y na rede. Dependiendo del tipu llicencia, ya qu'hai delles, una segunda persona pue faer usu d'un cantar, pinchlau, interpretalu, versionialu, regrabalu ... siempre y cuando lo faiga baxo la mesma llicencia que l'autor/a.

Dalgunes d'estes llicencies, nun son solo de reconocimientu del autor, sinon qu'ha d'haber un intercambiu económicu ente la parsona que va faer usu d'una obra pa versoniala (por exemplu) y lautor. Cola diferencia de qu'aquí ye l'autor el que pon los sos criterios económicos y cobra, non la SGAE que cobra lo mesmo pa toos y reparte na. Ye por eso que dependiendo de la filosofia del/a autor/a, pue usar el tipu de llicencia Creative Commons ensin sentise desamparau/á. Estes nun son les uniques llicencies, namas algunes. Queda por parte la curiosidá vuestra la d'atopar mas, analizar y contrastar.

Queria faer esta reflexón, porque a un pais tan pequeñu como Asturies, nel que la industria musical ye casique inesistente, la profesionalización queda pa tres (ya nin cuatro) y el papel de les discografiques nun va mas allá del Payares... nun-y queda otra que l'autoxestión, o intentalo nuna d'eses pequeñes discografiques. Pos somos nós, los que de forma autoxestioná, lo mesmo qu'esti fancin, tenemos de tirar p'alantre de la nuestra música. Dificil ye fichar con una discografica que mos xuba a les llistes d'esitu, dificil ye que mos pinchen nes emisores de radio, dificil que te contraten cobrando en condiciones pa un conciertu...

Dificil va ser polo tanto cobrar drechos de la SGAE, asina que... vamos faer usu de les tecnoloxies que tenemos al alcanze y si nun hai manera que mos graben un discu, pos autoproducilu, y si nun mos lu ponen na radio... pos ya lu moveremos pela rede (qu'esa llega a mas sitios) y si algún díi sacamos perres, pos va ser de los conciertos, que los discos, pa los grupos nun dexen ganancia. Pero vamos tener que faelo nos, ca un lo suyo, y toos lo de toos, sumando fuercies y esperiencies, y reivindicando drechos colectivos como músicos, creadores y/o apasiones/os de la música.

SalÚ!

Enlaces d'interes.

http://es.wikipedia.org/wiki/M%C3%BAsica_copyleft

http://es.creativecommons.org/

http://www.todoscontraelcanon.es/index2.php?body=ppal

Lo que vos diba falar güei ye d'un “Best Seller” en Llingua Asturiana. El llibru en cuestión salió a la cai el 23 d'avientu del 2008. Y nesti escasu mes que lleva na cai, ya se vendieron 270 mas los qu'hai espardios pelos llugares alternaivos de venta. Esto ye importante, pos trátase d'un llibru autoeditáu, ensin sudbenciones y ensin que ningún d'esos exemplares vaiga dar a les biblioteques publiques (eso fai inflar muncho les cifres n'otres publicaciones) y pa enriba ta siendo distribuyiu de forma alternativa. Pos entá asina, les cifres son bones. Nun soi a imaxinar lo que sedría d'esti llibru si los medios de comunicación fixéranse ecu d'él, si falaran de lo que fala o si simplemente punsieran una reseñuaca, nun lo soi a imaxinar, porque como diz un amigu... “si mio güela tuviera bigote, sedría mio güelu, non mio güela”. Pero qu'hai detras d'éstes ventes? Detras d'elles hai un llibru personal, intensu, envolvente, absorvente, emocionante. Detras d'elles ta un titulu, “Amarraza. 102 díes baxo la llei antiterrorista” y una hestoria real, la de Fernando Gonzalez Rodriguez “Fer”. Amarraza cuenta los 102 dies que Fer pasó en manes de la llei antiterrorista, y cuentalo con tou detalle, dende l'intre la detención, hasta que sal a la cai. Amarraza ta escritu casi como un diariu, cebandose nos detalles pero ensin feder, tresmitiendonos en tou momento ca una de les sensaciones; odiu, impotencia, angustia, claustrofobia, compañerismu, amistá, orgullu... Nesti llibru de non-fición, vamos poder saber comu opera la policia, como se furrula n'una comiseria acusau de terrorismu, como hai distintos graos de “xusticia”, como ye la vida na carcele (pal autor y pa la demas xente que la sociedá tien allí aparcá). Ye un llibru que quiero recomendar a tol mundu, comparta o nun comparta los ideales de Fer, comparta o nun compata la estratexa de Fer, comparta o nun comparta la llingua de Fer. Y ye que ya lo dixe, ye un llibru que quiero recomendar a tol mundu. Muncho mas a los que falen de llibros n'Asturies. La única tacha que-y tengo, ye algunos usos o terminos concretos de l'asturianu que yo nun comparto, pero eso poco tien que ver col resultau final (imaxino que muncha xente fadrá lo mesmo cola mio terminoloxia, hehehe).

Prestabeme dexavos equi un cachin d'un de los prologos del llibru por que tien dos. Esti cachin ta sacau del prologu que fixo Carlos Fueyo, vieyu amigu y compañeru de Fer, y que va espresar muncho meyor que yo, lo que ye la obra:

«Tú escribi daqué personal, que Dolfu fairá otru entamu más políticu», pidióme Fer fai dellos meses. «Bono, val», dixe-y yo. Pasaba'l tiempu y yo nun escribía un res. «¿Pero qué ye eso de personal, Fer?», entrugué-y un día. Y Fer:«Cuenta cómo viviste tú la hestoria dende fuera, por exemplu; nun sé, escribi lo que quieras.» Y yo: «Val, val.» Y darréu entrugábame pa mín: «¿Val, val? ¿ Y por qué nun me pide a mín lo político y a Dolfu lo personal?»; ya intentaba razonalo: «Ná, ye lo lóxico, ye normal que seya a mín al que Fer pida lo personal, porque sabe que, magar de la nuesa amistá y de tolo vivío xuntos no personal y no político, yo nun comparto les sos idegues nacionaliegues.»

(...)Porque esti llibru engancha. Engancha muncho y ún entrúgase por qué. Nel mio casu, como nel de munches de vosotres, pudiera debese —al menos ésti foi'l primer motivu nel que pensé yo— a que conocemos al protagonista y a otres persones qu'apaecen (¡incluso podéis salir vosotres mesmes!), y a que vivimos de dalgún mou y dende otra perspeutiva la hestoria que se cuenta. Pudiera enganchar tamién porque fala d'una realidá, la cárcel, que mos interesa. O quiciaves la rempuesta pue tar nel fechu de que nun dexen de pasar coses y la tensión caltiénse dende'l aniciu hasta'l final. O quién sabe si sedrá'l morbu lo que moverá a otres persones a la llectura...

Toes eses rempuestes puen servir parcialmente, pero pa mín que la razón principal ye otra: el llibru engancha porque ye bonu. Esti prologuista dedicóse a lleer nun tiempu pasaú por circunstancies que nun vienen al casu una riestra llibros de tipu autobiográficu sobre temática carcelaria. Pues nun hai color, ésti los supera a toos con diferencia abismal. Y pue tenese la idega (xustificada en munchas ocasiones, la verdá) de que toos esos llibros, anque mui voluntariosos y con un altu valor testimonial, son bastante cutres y d'un nivel lliterariu mui probe.

Nun siempres ye asina; por exemplu, una obra de Jesús Zárate titulada precisamente La cárcel foi Premiu Planeta en 1972, y magar que yá se sabe qu'un premiu nun ye sinónimu d'una ayalga lliteraria, sí al menos lo ye d'una calidá respetable.

Digo más. Esti llibru trespasa los llímites de la so voz y la so temática. Esti llibru podría formar parte con tolos honores del elencu de relatos hiperrealistes que, en dómines pasaes y en delles lliteratures europees, conformaron una corriente estética enfotada na revisión del realismu. El llibru de non ficción qu'agora preséntanos Fernando González Rodríguez poco tien qu'envidiar, por exemplu, a la novela El Jarama de Rafael Sánchez Ferlosio. La técnica magnetofónica pola que pasara ésta a la hestoria de la lliteratura española —con perdón—, alcuentra en munchos pasaxes d'Amarraza la so máxima expresión posible. La fidelidá de Fer na expresión de los testimonios orales, la so meticulosidá na recoyía de datos, la so obsesión pol detalle, nun tienen comparanza.

¿Y qué dicir de los personaxes —que, amás, nesti casu son persones? Tán perfeutamente carauterizaos. La so descripción llógrase de mena nidia al traviés de lo que dicen. Les pallabres retraten al personax nel llibru lo mesmo qu'a la persona na vida. Aparte de Fer, protagonista indiscutible y al que toles que lu tratéis reconoceréis dafechu no que diz y tamién no que fai nel llibru, a mín el personax-persona que más m'impresiona ye
Geles, la so má, y tamién Saúl, el so pá. De los tiempos d'Insumisión sabemos del valor que deben tener, que tienen, los pás y más de les preses. Saúl y Geles amosaron esi valor naquellos años, amosáronlu agora una vegada más y de xuru que volverán facelo si-yos tocara de nueu. A Geles y a Saúl quisiera dedica-yos, n'humilde homenax, les pallabres d'esti entamu.

Alrodiu 'l conteníu del llibru, nun voi comentar ná. Per un llau, tórgame'l procuru que tengo de tener en non adelantar coses a les llectores. Per otru llau, prestaríame sobre too facer dalguna puntualización a ciertes valoraciones polítiques que fai Fer sol trabayu y l'actuación de Familiares y Amigos en dellos momentos (y tamién sobre dalguna postura que nun entiende de mín, en particular). Sicasí, camiento que nun ye l'espaciu nin
el momentu afayaízos. Muncho ya ta aclarao con Fer y, amás, yá se sabe que tengo qu'escaecer lo político nesti prólogu... Asina que, pa dicir daqué xeneral respeutu al conteníu, sólo vos adelantaré que lo que me paez más sobresaliente del rellatu de Fer ye la so sinceridá: sinceridá en tolos temes y con tol mundu, sinceridá demoledora a vegaes.

Y dexo pal final l'aspeutu más valoratible del llibru y pol que, según la mio opinión, ésti merecería salir de los ámbitos reducíos a los qu'en principiu ta destináu. «Nun cantes a la lluvia, poeta, fai llover», diz un anónimu aymará. Abúltame tamién a mín que la lliteratura debe, per enriba de too, emocionar, facer sentir. Pues Fer, ensin dulda, llógralo.

Sí, llectores, preparáivos a sentir. A sentir mieu, desamparu, ansiedá, frío, sueñu, fame y sede. Si padecéis de claustrofobia, recomiéndovos salir a lleer el llibru frente a la mar o en lo alto una montaña. Vais sentir l'abandonu, vais sentir la soledá. Vais pasalo mui mal y, a ratinos, bien.

Vais sentir lo que ye tar preso y vais sentir lo que ye la llibertá. La llibertá qu'aspero que nun-y vuelvan robar enxamás al mio collaciu Fer, un asturianu d'Asturies.

Pos con esti estractu del prologu de Car, dexovos pa que vaigais a pol llibru.

SalÚ!

El llibru podeis atopalu en: Centru Social Setaferia (Xixón).El Baruku (Xixón) Llibreira Paraxuga (Uviéu). La Casa Posafuelles (Uviéu). L'Arcu la Viella (Uviéu). Casa Maria (Uviéu). La Gueta (Candas). Si sabeis de dalgún sitiu mas, amestailu en comentarios.