“No tiene usted derecho a hablar la lengua que le de la gana”. Estes fueron le pallabres que con tol odiu y ascu del mundu salieron de la boca de la xueza Ángela Murillo na primera vista del xuiciu a Fer, tal día como un doce del ún del dosmilnueve.

 Pa poner n'antecedentes a la xente que nun tea al tantu o namas conoza la versión policial de los fechos... Dicivos que Fer (un militante independentista d'izquierdes y activista social) ta siendo xulgáu como presuntu culpable d'estragos terroristes en gráu de tentativa (subrayo esto, porque la prensa escaezlo). Si, la hestoria entama en Piloña, mas concretamente en L'Infiestu, anque nel momentu de la detención tolos medios de comunicación se fixeran eco del la información filtrá pola policía na que se-y acusaba hasta de la muerte de Chanquete. Pero resulta que “la trampa rescampla” o como se suel dicir... “al cocer mengua”, y ye que namas ta siendo procesáu polo que vos falo, anque de mano ya fuera acusáu y condenáu en tolos medios de comunicación d'haber cometió mas de venti atentaos (quien desfai esa mentira agora?). Como dicía, el casu entama en Piloña, o non??, entama en Cangues d'Onis??. Si, xustamente unos dies enantes taba autorizá pol delegáu de gobiernu una concentración ultradrechista, racista y xenófoba pol grupu Democracia Nacional. Ante esta convocatoria, féxose otra contraconvocatoria antifacista, la cual foi duramente reprimía con dellos mancaos y detenios. Anguañu 14 d'est*s antifacistes enfréntense a un macroprocesu politicu-xudicial ensin precedentes n'Asturies nos que la suma de los años de la petición fiscal llega a los 35 años de prisión. Si, claro que si, ye esi famosu 35 que veis pintau per tolos astiales d'Asturies. Pos si, pué que too empezará n'aquel día d'impotencia nel que les fuercies de seguridá enviaes pol delegáu de gobiernu reprimíen duramente a los antifacistes, ente ell*s a Fer.

 Con esti blog de güei nun quiero faer un percorriu pel casu, que ye mui llargu, nin si de lo que taba a un tris de faer Fer taba bien o non, que ca un y ca una saque les sos conclusiones, eso si, alloñandose de lo mediatizao, d'esa caudriacatura que mos quieren meter na cabeza. Y teniendo en cuenta que n'Asturies les protestes llaborales d'unos y otros sectores dexaron n'Asturies múltiples estragos d'ésos. Pa ún que nació en La Cuenca'l Nalón y participó como tantísima muncha otra xente, ye fácil recordar que nes movilizaciones mineres volcaronse camiones, formigoneres, baltiáronse faroles, cortáronse raíles del tren, carreteres ... quemáronse coches abandonaos pa faer barricaes... quemáronse neumáticos, conteneores... fixéronse sabotaxes... too ello col beneplácitu de la mayor parte la población y cola instigación d’unes cúpules sindicales que dempués d'usar esi arma de presión firmaríen y fadríen lo que quisieren nos convenios o nes reformes de turnu. Y lo mesmo los denominaos alcaldes mineros (ríome yo del terminu), estos tamién afalagaben a la mobilización y defendienla públicamente con toles consecuencies. Pero por raro que paeza, enxamas xulgaron a ningún líder sindical nin a ningún alcalde por éllo. Y lo mesmo pasaba cola xente de la siderurxa... el sector del metal y naval... Recuerdo tamién munchos titulares nos que se quería mezclar estes aciones de llucha col tema vascu, con aquello de que si veníen instructores de cale borroka y la de mi madre a enseña-yos a defender el pan a l*s trabayaores asturian*s, rieme yo d'aquello. Anque mas bien apetezme berrar, porque habia pininos qu'hasta lo creyíen.

 Pos eso, que yo lo que quería falar nun yera del casu Fer en sí, si non de la llingua, esa que tanto se fala pela rede, con milenta periódicos, foros, fotologs y blogs. Esa que tan digna ye de protexer y puxar por ella. Esa que tanto s'escribe, pero tan poco se fala. Esa que sufre agresiones tolos dies y nun falta quien llebante la so voz escontra quien la reprime. Esa que per primera vez diba ser escuchá na audiencia nacional de Madrid, porque a un cabezón, consecuente colo que piensa, ocurriose-y que teníen de pone-y un interprete. Si, enfotose y la mesma audiencia nacional almitiolo, dixo que si, que-y diben poner interprete. Y hasta allá que foi toa una señora académica de la nuesa llingua, pa faer d'interprete asturianu-castellano ente un acusáu y el tribunal que lu va condergar. Pero el casu nun foi asina, non. El casu ye que la xueza tenia priesa (eso vímoslo tol*s que tábemos ellí) y dixo qu'al nun ser una llingua oficial que ná da ná (entós pa que lo permitió nun principiu?). Dio-yos un tiempín a Fer y les sos abogáes pa charrar ente ellos y ver que diben faer, y asina siguio'l xuiciu. L'abogá de Fer espuso que'l so defendíu diba a contestar les preguntes que se-y fixeran en castellano, y que les contestaría na forma que mas cómoda-y fuera pa él. La xueza pidió que-y aclarase la cuestión, a lo que l'abogá repitió lo mesmo. La xueza ya nun aguanto más! Y soltó el so “No tiene usted derecho a hablar la lengua que le de la gana”, y con eso taba too dicho, y con eso ya ta too dicho y con eso va tar too dicho. La farsa tubo otru golpe encuantes qu'arranquen les entrugues cola de “ ratifica usted la declaración hecha ante la audiencia nacional el blablabla” y Fer arrespuende con un “Si ratifícola”. Y el fiscal que diz “¿qué?”, y Fer “si, ratifícola” y el fiscal cual guaje acusica “señoría, señoría, no entiendo lo que dice”. El restu preguntes Fer nun les contestó, la verdá ye que nun se si fixo bien o non, tobia lo toi cabilando, lo que ye seguro, ye que lu perxudicó. Pero de lo que nun hai duda, ye que Fer, aparte de cabezón, ye coherente consigo mesmu, coles consecuencies qu'ésto puea traye-y.

 Y agora ye onde yo entrugo... ú ta esa coherencia en mi??, si en mi?? munches veces escribo n'asturianu, bueno siempre, incluso nel politécnicu dependiendo l'asignatura contestaba los esámenes n'asturianu, pero non siempre la falo, o mas bien ca vez falo un amestáu mas finu. Pero tamién entrugo, onde ta la coherencia de toa esa xente qu'escribe blogs, fotologs, prensa dixital, llibros, discos y tolo que se publica na nuesa llingua??? Si, dicíimelo, ú ta???!!! Yo casique nun la veo. Tampoco naide nun va faer mención de les pallabres de la señora xueza?? naide nun va faer mención de l'actitú de Fer ante la vulneración de so drechu llinguisticu??? O mas bien ye qu'a naide nun-y interesa enporcase con un apestáu, un acusáu de “terrorismu”. El tiempu va dicilo, porque cuando les persones nun respuenden, ye'l tiempu'l que respuende por élles. Yo voi responder por mi!

Tenemos un problema de llingua y llinguater*s. Al fin y al cabu la hipocresía puémos. Ye hora fae-y frente!